By JADE MALICDAN

Sa aming buhay, kayo ang aming ilaw
Nagbibigay liwanag sa aming paglalakbay.
Gumagabay habang aming tinatahak
Itong mundo na sadyang magulong tunay.

Mga pangaral ninyo’y ginto ang nakapaloob
Tumatatak at mariin naming tatandaan.
Inyong mga paalala’y binabalik-balikan
Nagbibigay sigla’t lakas sa ’ming isipan.

‘Di maikaila ang pagdating ng bagyo sa’ting buhay
Ngunit kayo pa ri’y matatag na uma-agapay.
Kayo’y aming naging takbuhan at silungan
Isa kang dakilang Ina at matalik na kaibigan.

Isang napakalaking pasasalamat sa biyaya
Sa ating Poong Maykapal siyang lumikha.
Nagbigay ng mapagmahal at maalalahaning Ina
Upang kami’y lumaki na kaaya-aya.

Tawag namin sa inyo’y Ina, Inay, Nanay, o Mama
‘Di pa rin mapantayan aming pagmamahal, O Ina.
Iyong pagmamahal, sakripisyo’t, pag-unawa
Magpakailan man ay di malilimutang tuwina.

Nang dahil sa inyo’y marami kaming natutunan
Pagsubok ng buhay haharapin at pag-aaralan.
Sa tagumpay at pangarap na aming natamo
Kayo’y naging bahagi sa pag-abot nito.
Ang inyong pawis at dugo na ini-alay sa amin
Sa ami’y mananatili na walang kakupasan.
Para sa inyo Inay, ang aming pagpupugay
At ‘di magmamaliw na pagmamahal.