Ang buhay sa ganitong sistema…

ni Dap-ay Sapata

10 October 2003/1451 hours

Ang buhay sa ganitong sistema ng ating lipunan

   ay hindi tulad ng isang handaan

May masayang nag-aawitan, may nagkukwentuhan, hitik sa pagkain

   makikita ang ngiti sa labi ng bawat isa

Ang buhay sa ganitong sistema ng ating lipunan

   ay hindi tulad ng isang kasalan

Na malaya kang maglalakad sa altar na puno ng pagmamahal

   at pag-asa sa piling ng iyong minamahal

Ang buhay sa ganitong sistema ng ating lipunan

    Ay hindi katulad ng isang awitin o tula

Na maaari mong ihayag ang nilalaman ng iyong damdamin

    At paghanga sa lupang sinilangan

Ang buhay sa ganitong sistema ng ating lipunan

    Ay hindi tulad ng isang tag-ulan

Na matutubigan ang tuyong bukid at parang

Kung saan ay maaari kang matulog sa himig ng patak ng ulan

Ang buhay sa ganitong sistema ng ating lipunan

    Ay hindi tulad ng makulay na ilaw sa kalunsuran

Dahil diskriminasyon ay laganap sa hanay ng mamamayan

Ang buhay sa ganitong sistema ng ating lipunan

    Ay walang kasiguruhan

Hanggat hindi tayo kumikilos upang baguhin ito

Singlabo pa ng tubig sa estero ang magiging kinabukasan ng mundo.#