Bilad  sa  araw  at  may  hawak  na  araro

Lubog  ang  mga  paa  sa  lupa  at  balot  pa  ng  putik

Sa  kabilang  kamay  kanyang  hawak  ang pamitik  sa  kanyang  matandang  kalabaw

Bakas  sa  kanyang  mukha  ang  katandaan  at  kahirapan.

Hinukot  na  ng  panahon  ang  kanyang  dating  malakas  na  katawan

Sinunog  na  din  ng  araw  ang  kanyang  balat

Ngunit  kahit  na  ganoon  na  ang  kanyang  kalagayan

Malayo  pa  rin  ang  kanyang  pag-ahon  sa  kahirapan.

Kanyang  tangan  ang  isang  lumang  piko

Patuloy  siyang  nag bubungkal  ng  lupa

Patuloy  na  magtatanim

Ngunit  iba  naman  ang  nakikinabang  sa  kanyang  aanihin.

Hindi  kanya  ang  lupa

Siya  ay  isa  lamang  sa  mga  alipin  nito

Pinahihirapan,  patuloy  na  nagtatrabaho

Upang  umasenso  ang  ibang  tao.

Ang  kanyang  mga  paang  malayang  nakapaglalakad

Natatanikalaan  naman  ng  kahirapan

Ang  kanyang  mga  kuko  sa  paa  ay  pawang  mga  patay  na

Tuluyan  ng  inalisan  ng  buhay  ng  lupa.

Araw-araw,  linggo-linggo,  buwan-buwan  at  taun-taon

Ibang  lupain  ang  kanyang  sinasaka

Iba’t  iba  ang  nagmamay ari  at  nakikinabang  sa  kanya

Iba’t  iba  ang  umaalipin  sa  kanya.

Kailan  kaya  kanyang  muling  maiaahon 

ang  kanyang  mga  paang  nilamon  na  ng putik?

Kailan  niya  muling  maiuunat

Ang  kanyang  katawang  hinukot  ng  paghihirap?

Kailan  niya  muling  maititingala  sa  langit  ang  kanyang  mukha

At  kanyanyang  masasabing “Ako  ay  malaya”?

Kailan  niya  kaya  mapapalaya  ang  sarili 

Sa  tanikalang  nakagapos  sa  kanyang  katauhan?

Bumangon  ka!  Ngayon  na  ang  panahon

Ito  na  na  ang  pagkakataon  upang  ipaglaban  ang  iyong  kalayaan.

Huwag  mong  hayaang  sa  kahirapan  ay  mabulok  ang  iyong  katawan

Huwag  mong  hayaang  iba  ang  makinabang  sa  iyong  pinaghirapan.

Iahon mo ang iyong mga paa mula sa putik

Iunat  mo  ang  iyong  katawan

Tingalain  mo  ang  langit

Kalagin  mo  ang  mga  tanikalang  gumagapos  sa  iyong  mga  paa.

Bumangon  ka  Pilipino!

Umahon  ka  sa  kahirapan

Huwag  kang  paalipin  sa  banyaga

Ikaw  ay  isang  Pilipinong  lahi  ay  sa  mga  lakan.

Bawiin  mo  ang  iyong  lupaing  inangkin  ng  banyaga 

Na  kanilang  ginagamit  upang  sila  ay  magpasasa.

Ipaglaban  mo  ang  iyong  karapatan

Ipaglaban  mo  ang  kapakanan  ng  iyong  bayan.

Ikaw  man  ay  isang  taong  may  karapatan

Ikaw  din  ay  taong  nilalang  ng Diyos.

Huwag  kang  manatiling  magsasaka  sa  lupaing  inaalipin  ka

Bumangon ka!  Ikaw  ay  isang  Pilipinong  marangal  ang  lahi!  Bumangon ka!