at ako’y isinilang

nang matalo ng apoy ang dagat

nang pitasin ang ipinagbabawal na mansanas

nang gawing gabi ang umaga

at umaga ang gabi 

narating ni ama ang sagradong lugar

nang pasukin nya ang natutulog na diwa ni ina

nahanap nya ang hindi nya mahagilap

sa tuwing gising ang kamalayan ng sinta,

pag-ibig

napag-isa ang mundo nila

napag-isa nga ba? 

ninakaw na pag-ibig

yan ang tawag niya

pagsasama ng magkaibang planeta

magkasabay kayang kumikislap ang mga bituin sa langit? 

kasalanan ang umibig sa mortal

dahil kapalit ay kamatayan,

buhay ng minamahal

kapag natagpuan ang pag-ibig,

matatagpuan din ang kamatayan 

pitong taon na akong patay

bakit pa nga ba ako isinilang?