Dalawang inihaw na tilapya ang magkatabi sa ibabaw ng bandehado sa hapag, parehong mistulang uling. Katabi ng bandehado ang isang maliit na mangkok na may lamang toyo, sili at kamatis.

Sabi ng una, "Anim na tulog na lang bago ang huling hatol. May presidente ka na ba?"

"Edi ako," tugon ng ikalawa.

"E bakit naman?" tanong ng una na mistulang nangungutya.

"E bakit hindi?"

"E ano ba dahilan mo't sya ang napili mo? Pwede ba namang walang dahilan?"

"E sya lang ang pinaka hindi ko ayaw e."

"Ha? Bat mo naman nasabi?"

"A basta!" tugon ng ikalawa. At sa isang iglap, nahati ang katawan nito at nawala ang bahaging bandang buntot.

"O, napipikon ka na ata e," udyok ng una. "Nagtatanong lang naman. Ako kasi boto sa may galing at talino."

Pagkatugon ng una'y natapyas ang laman nito sa bandang ibabaw.

"Hindi ko tinatanong!" pabalang na tugon ng ikalawa.

"Alam mo kasi, dapat, sa pagpili ng susunod na mamumuno, maging mapanuri ka," pangaral ng una. "Hindi pwedeng ipagpasa-iniminimaynimo lang ang ganyan ka-importanteng desisyon."

"Alam mo, di ako naparito para makinig sa lecture mo . Pag hindi ka tumigil lalagyan ko ng busal ang bunganga mo."

Habang nanggigigil na winiwika ng ikalawa ang mga ito, nababawasan ang nalalabing laman niya hanggang sa ulo na lang ang natira.

"O relaks ka lang. Gusto ko lang naman ipaliwanag ang katotohanan. Kasi ikaw rin naman ang mag-aani ng hinahasik mo. Kita mo ako, pinag-isipan kong maig... AAAAAAAHHHH!"

Naputol ang pangungusap ng una nang biglang may tinidor na tumuhog sa ulo nito. Nagsipag-kalansingan ang tinidor at kutsara sa plato at may lumagabag na silya. Kasunod nito'y may mabigat na yabag na nagmamadali papalayo.

At tahimik muli sa may hapag.