Naala-ala ko noong edad 16 ako. Nasa Senior High ako at lokong-loko sa pagbabasa ng Tagalog Romance. Patay na patay ako sa mga akda ni Helen Meriz at Mariz Crisostomo. Sinimulan kong magsulat ng sarili kong akda sa isang kwaderno. Tagabasa at tagahanga ko ang aking mga pinsang buo na sina Tin-tin, Christianne at Munte. Kilig na kilig ang mga loka sa amatuer kong pagsusulat. Hindi ko na nga matandaan ang kwento sapagkat nawala na ang kwaderno at iyon at mahigit 16 taon na ang nakararaan.

Dahil sa aking pangarap na iyon, binigyan ako ng ate kong si Dulce ng isang maliit na aklat. Ang pamagat ay "Gusto Kong Maging Writer" at ang may akda ay si RM Custodio. Sa likod na pahina ng nasabing aklat ay may application form para sa Gusto kong Maging Writer Club. Sumulat pa nga ako kay G. Custodio at nagtanong ng ibang tips at sinagot naman niya. Nakatatlong anunsyo pa siya na ang lahat daw ng kasapi ay magkakaroon ng pagtitipon nguni't dahil sa isa lamang akong hamak na mag-aaral, hindi ako nakarating alinman sa pagtitipong iyon. Bukod sa takot akong sumabak sa biyahe mag-isa (sapagkat ako'y tanga pa't nakatira sabulubundukin ng Montalban) ay wala naman akong paggastos. Sayang nga, hindi ko man lang nakilala ng personal si Ginoong Custodio.

Hanggang ngayon, nasa akin pa ang aklat. Bagama't natatangga na ang mga pahina sa tagal ng panahon, itinuturing ko iyon na kayamanan. Frustrated writer kasi.

Isang araw, ibabahagi ko dito ang mga nakalagay sa aklat na iyon. Alam kong magagaling na kayo sa larangan ng pagsusulat nguni't bakasakaling may mapulot pa rin tayo.

Hanggang sa muli at maraming salamat.