Kung magdala tama lang
minsan naman kulang
hindi sumosobra
laging kasyang-kasya

Hindi nagmemeryenda
ang ulam ay tinapa
may kanin lamig pa
makararaos na

Dukutin ang bulsa
merong barya-barya
pambili sa bangketa
gamit galing Tsina

Damit ay kupas
luma ang tsinelas
sapatos nakangisi
medyas may tagpi

Sabon na pampaligo
bareta hindi shampoo
ang para sa labada
ok na kuskos kula

Laging nagtatabi
wala kang masabi
may pera syang pirmi
lalo na sa emergensi

Ginagamit ang dunong
buhay ay susulong
kung ikaw ay marunong
walang butas ang bubong

Sa ligalig ay handa
unos man bumulaga
di maubos ang biyaya
naipon niya sa tyaga

Sa sinop sa salapi
budget hati-hati
pag' anak nanghingi
mayrong ngiti sa pingi.

Walang masama sa matipid
kung kabutihan ang hatid
saya'y walang patid
ginhawa'y nababatid

Masabi mang maramot
wag' kang pasisimot
mas mabuti nang kuripot
kaysa sa umaamot

Mag-ingat nga lang minsan
sa sobrang kakuriputan
'wag maging gahaman
para sa Dios ay maglaan.