Magpapaalam lang po ako,

                                                Sisimba lamang kami ng mga ka-text ko

                                                Siyam  na buwan lang

                                                May bibinyagan

                                                Simbahan ng kabataan

                                                Malalamig na silid

                                                May short time, may three hours.

                                    May  group project po kami.

                                    Ilang linggo lang

                                    May sex scandal na kakalat

                                    Sa Quiapo, sa Cubao

                                    At sa overpass, sa underpass

                                    At sa may pintuan ng mga unibersidad.

                                                Aatend lang po ako ng party

                                                Sa basket ball court

                                                Sumasayaw ang ilaw na may kulay

                                                Walang anino sa gitna ng sayawan

                                                Sa tabi ng sulok

                                                Madilim

                                                Mga aninong gumagalaw

                                                Mahaharot

                                                Malalaswa…makasalanan!

                                    Sa gimikan,

                                    Yes na Yes!

                                    Sa Margarita walang sabit!

                                    Sa pale pilsen laging bucket,

                                    Sa sigarilyo, buga-hithit!

                                                Laging absent sa social service,

                                                Perfect attendance, sa counter strike

                                                Sa Dota’y laging da best!

                                                Ang kikay kit, complete sets

                                                Sa pagti-text ang lulupet!

                                                Asayments sa iskul, laging sabit.

                                    Naglaho na si Maria

                                    Si Andres…

                                    Si Pepe.

                                    Sumanib na ang Kanluran.

                                    Pumasok na ang Hilaga, ang Timog.

                                    Lumambong na ang Silangan.

                                    Nagpatianod, lumangoy…

.                                   Nalunod.

                                    Umanlad ang mundo.

                                    Nilukob na ng makabagong agham.

                                    Nilamon ang kultura, ang moralidad.

                                    Tuluyan nang tinangay ang kabiyak ng tsinelas.

                                    Tinangay na ng malakas na hangin ang saranggola,

                                    Ang abaniko…

                                    Nawalan na ng gatong ang lampara.