nasubukan mo na bang maligo sa ulan?  tumakbo at tumingala sa langit habang bumabagsak ang malamig tubig sa iyong mukha?

nasubukan mo na bang makipagtakbuhan sa mga bata na naglalaro sa tapat ng bahay nyo?  maghabulan hanggang magkadapa-dapa ang mga kalaro mo?

nasubukan mo na bang kumanta sa videoke?  kahit walang choice ang mga kapit-bahay mo kundi ang pakinggan ang hopeless case na singing voice mo?

nasubukan mo na bang tumawa?  bumungisngis, humalakhak hanggang maubusan ka na ng hininga at mapaluha sa sakit ng tiyan mo?

nasubukan mo na bang maglakad sa tulay ng guadalupe?  magmukhang tanga o walang perang pamasahe sa jeep dahil ikaw lang ang naglalakad sa kalsadang puro pampasaherong sasakyan lang ang dumadaan?

nasubukan mo na bang magsuot ng damit na never sa hinagap mo ay isusuot mo dahil sa sobrang kabaduyan?  maiba lang?  

nasubukan mo na bang mahabol ng aso?  umakyat sa pader, lumambitin sa gate, mawalan ng tsinelas wag lang makagat?

nasubukan mo na bang mahulog sa kanal?  mandiri at masuka sa bantot ng sapatos mo?

nasubukan mo na bang sumabit sa jeep, magback-ride sa motor o tricycle?  damhin ang hangin at panganib na mahulog o tumilapon?

nasubukan mo na bang kumain ng isaw, betamax, ulo ng manok, balot, fishball o tukneneng?  kumain ng mga pagkaing mayaman sa germs, magsawsaw sa sauce na pinagpiyestahan ng laway at pawis?

nasubukan mo na bang mangatwiran sa teacher mo?  makipagdebate hanggang sa sumakit ang ulo niya?

nasubukan mo na bang sumigaw?  humiyaw hanggang mangalit ang litid mo sa leeg?

nasubukan mo na bang lumangoy?  sumisid at dumilat sa ilalim ng tubig, makita kung ano ang nasa ilalim?

nasubukan mo na bang sumayaw?

nasubukan mo na bang maglakad sa gabi?  tumingala sa langit at pagmasdan ang mga bituin?  

kung oo binabati kita dahil buhay ka.  

maraming tao ang hindi na alam kung paano ang mabuhay.

pera nalang ang mahalaga.

magkaiba ang humihinga nalang sa talagang buhay.

hindi naman kailangan ng pera para maramdamang buhay ka.

o para makita mo kung gaano kaganda ang buwan at mga bituin sa langit.

hindi kailangan ng pera para kumanta, sumigaw, sumayaw o magtatakbo.

lalong hindi kailangan ng pera para umulan.

hindi ba napakaswerte natin dahil walang bayad lahat ng ginawa ng diyos, kaya bakit hindi natin samantalahin. 

wala namang masama kung paminsan-minsan mag-isip bata tayo,

magwala, tumawa,

makalimot at magmukhang tanga,

kung sa ganitong paraan naman natin mararamdaman 

na buhay pa pala tayo...