Magkasabay ang hilik mo

at paghalik ng kamay ng orasan

sa mga numerong nakaantabay

nanunood sa pasmado mong pag-idlip

Sana, katulad ng iyong pagkakahimlay

itong paligid kong ginagalawan

Tahimik, tikom, ang tanging pinagkakaabalahan

ay paghagilap sa mailap na panaginip

Kanina, tatlumpu't dalawang minuto ang lumipas

dilat ka at kausap ang patlang sa hangin

Nang magtampo sa hindi niya pag-imik 

dinaldal ka nito sa maingay na katahimikan

Ngunit nakapikit na ang iyong mga tainga

mga mata mo lamang ang taimtim na nakikinig

Takot na ang apat na pader sa iyo

sawa na sila sa mga hinaing mo

Alam mo bang narito ako?

nabibilang sa latak ng pinakawalan mong paglimot

Alam mo bang ni minsan ay hindi ako lumisan

at handa pa ring nakawin ang bangungot ng susunod mong umaga