Hindi ko maitatwa, hindi ko makuha,
Bakit nangyari ang ganoong eksena.
Natulog akong may ibang iniisip at ginagawa,
Ngunit bakit ganon, pumasok ka sa isip ko nang bigla.

Iniisip kong mabuti, ano kaya ang nagbabadya,
Hindi lang dalawang beses inisip na kumustahin ka,
Napapikit na lang ako at nagdasal ng bahagya,
Na sanay nasa maayos at nasa mabuti ka.

Tinanong ko ang aking sarili, hindi pa nga ba nakalimot
Bakit ganoon, ako'y tumagilid at nagkumot,
Nakaramdam ako ng pag-alala at takot,
Na parang bulaklak na unti-unting nawawalan ng talulot.

Mahigit apat na taon na tayong kanya-kanya,
May mga sarili nang responsibilidad at pamilya,
Subalit ang lambot ng kamay mo, at init ng iyong presensya,
Ramdam ko pa rin, sa panaginip ko kanina.

Naalala ko pa, lambing mo sa akin sa panahong nagdaan,
Ipagluluto at tinatawagan,  upang ika'y saluhan,
Ang sarap mong magluto ng isda at beef caldereta,
Kuwentuhan at tawanan, ayoko nang matapos pa.

O Diyos ko, tulungan Niyo ako,
Kung may natitira pang kasinungalingan at motibo,
Pakawalan na siya, sa Puso kung nakatago,
Sapagkat alam kong hindi ito magandang signo(s).