Sapagkat Iniibig kita...

 ni Dap-ay Sapata

08 February 2006/ 1055 Hours

Tagpi-tagping pangarap sa ligalig na kalangitan

Luntiang mga dahon, nagagalak na mga ibon

Magtago ka at tumakbo sa hapdi ng init

Sandali, huwag ka munang lumisan sa aking kasalukuyan

Tayo ay kanina lang sa pagkikitang inaasam

O kaybilis ng oras, paalam na naman!

Sapagkat iniibig kita...

Isa-isa nating balikan ang ating nakaraan, kahinaan at kamalian

Magsaya tayo at magdiwang sa tugatog ng tunggalian

Sagutin ang mga tanong at luha ng pangamba

Hanggang kailan magtatago ang mga pinagtagpo ng pag-asa

Ng pagsikat at paglubog, ng luha at mga ngiti, ng buhay at kamatayan

Sapagkat Iniibig Kita...

Ang multo ng ating paglalayo

Ay ginagambala ang tahimik na karimlan

Ang mga sulat, tula at alaala ang ating kayakap

Tapat nating pag-ibig ang magpupuno sa mga panahon ng pagkukulang

Panahon ng pag-iisa, pananabik at pag-aalala

Kailan ang katiyakan na muli kang makasama

Sapagkat Iniibig Kita...

Ang saranggola ng pag-asa ay lilipad

At patuloy na lilipad sa nagngingitngit na kalangitan ng buhay

Upang sa muli atin siyang matanaw sa maaliwalas na araw

Na kapiling ka, kayakap at katuwang

Sa pagbabago ng buhay at lipunan.

Sapagkat Iniibig Kita..#