Sino Ang Nasa Likod ng Puting Tabing?

Isang umaga sa Kultura ng Sentro ng Pilipinas

Sa tanghalang Huseng Batute isang dula iyong mamamalas

Abala ang staff sa isang produksyon

Inihahanda ang entablado at mga pangunahing aktor.

Ilang sandali pa’y dumilim ang kapaligiran

Manonood ay sabik sa kanilang mga upuan

Curtain! Sigaw ng direktor

Bumukas ang puting tabing sabay tutok ng spotlight sa aktor.

Umusok ang paligid, unti-unting nauulinig ang musika

Sumasaliw na tugtugin, kasabay ang pag-arte at pagkanta

Animo’y nagtatalo ang lalaki at babae

Lalaking nanghaharana at nangungumbinse.

Sa pagbilis ng tugtuging instrumental

Ay pagbilis ng paggalaw at pag-indayog ng pagtatanghal

Isang sukol na pangyayari, pagniniig ng dalawa

Hingal at galak sa kanilang mga mata

Pagpapahiwatig ng isang maluwalhating kaganapan

Curtain! Sigaw ulit ng direktor

Masigabong palakpakan, habang sumasara ang telon.

Unti-unting nawawala ang ingay

Sa loob ng tanghalan, walang kabuhay-buhay

Tapos na ang pagtatanghal

Nilalamon ang paligid ng kadiliman.

Sa gitna ng kawalan, isang tinig

Tinig na nanunuot sa kaibuturan ng kaluluwa

Matinis na pagsasamo

Papalakas ng papalakas, nakakabingi!!

Tanging ang apat na sulok ng tanghalan ang piping saksi.

Lumiliwanag ang karimlan

Ugong galing sa entabladong tanghalan

Bumukas ang puting telon, tinig ay napalitan

Paghihikahos at lupit na daing!!!

Naglipana na kaluluwang nananahan

Paghihirap ay tila walang hanggan

Lalaki, babae, matanda at bata

Mga naiwang ligaw at walang mga mukha

Tanging palahaw at pagpapalaboy-laboy

Sisigaw, hahalakhak at mananaghoy!!

Liwanag ay unti-unting nilalamon

Palahaw, ay naglalaho

Puting tabing sumara ng dahan-dahan

Patunay ng pagtatapos ng isang lihim ng pagtatanghal.

Bukang liwayway

Panibagong dula ang ulit bibigyang buhay

Di alintana ang magdamag na nagdaan

Na may ibang namamahay at yun ang katotohanan.

Pagtatanghal na tunay na nakapanghihilakbot

Hindi maipaliwanag na damdamin sayo'y babalot

Sino ngayon ang totoong nasa likod ng tabing

Mga buhay na nagtatanghal o ang mga mistulang nakalibing.