Paggising sa umaga,

Ngiti mo’y siyang araw

Na inaabangan.

Init ng iyong haplos

Sa aking pisngi

Ay tubig na pamawi

Ng mga agam-agam.

Daming taon ang dumaan

Nang walang patid

Na paghihintay.

Daming mga araw

Ang inabatan

Sa bunsong yayakap

Sa aking pangalan.

Ay, bakit nga ba

Dumating ka

Sa panahong

Handa nang masasabi?

Hawak ko ang iyong kamay

Sa mga gabing

Iniisip ko ang iyong paglaki.

Salamat sa pagdating mo,

Salamat sa iyong pagmamahal.

Di mo pa man ito kayang sabihin,

Kaytagal man kitang hinintay,

Alam kong ikaw ay para sa akin

bunsong anak, aking mahal.