Kanina,

Matapos ang ilang araw nang walang

Balita mula sa ‘yo

Walang ha

Ni ho

Tumunog ang telepono ko

Mensahe mula sa’yo: 

Papunta na ko jan baby

Sira cp ko

Hintayin mo ko sa baba. 

Nagdalawang isip ang puso ko

Pipintig o

Malulusaw? 

Ito ang araw na aaabangan kita

Sa pintuan

Dala ang mga gamit na iniwan mo

Sa aking aparador

Ang mabilis

At walang kabig na pamamaalam

Sinosoli ko na ang kandila mong

Upos.

Pundido. 

Nguni’t di napigil

Ang puso kong tanga

Na naghihintay

Sa baba ng gusali

Sa tapat ng pila ng traysikel

Pinagtitinginan ng mga usiserong

Kapitbahay

Hithit-buga sa ikatlong yosi

Inaantok.

Umaasa.

Naghihintay sa’yo

Naghihintay sa wala.

Natapos ang tatlong magdamag

Dumating kang

Nababalot ng libog

At ng halimuyak ng

Kawalang-muwang.

Ang matulog sana sa tabi mo

Ang aking kunswelo

De bobo.

Pinalitan mo ng mga halik

Na dapat sana’y hilik

Na hindi mamutawi

Dahil natatakpan

Ng iyong mura

At nag-iinit na katawan

Na bumabayo

Sa aking katahimikan. 

Ang pakikipagbaratan,

Wag muna ngayon-

Sige na-

Gusto ko lang matulog-

Wala na akong suot,

Nauwi sa barurutan.

Di mo alintanang

Nagdurugo ako. 

Natapos kang kumikislot

Hinihingal

Nakahandusay ka

Sa aking kama.

Kay sarap tamnan

Ng patalim ng

Iyong hunkag na dibdib. 

Mahal mo ba ako?

Huh?Mahal mo ba ako?

Oo.

Sabihin mo

I love you

Tangina mo. 

Nagpahatid ka na sa baba

Gaya ng puso mo

Nahungkag ang kuwarto ko. 

Hilik. 

Hilik. 

Hilik. 

Mas matamis ang halik

Ng pag-iisa.