Uunahin kita, Inay

Sa malubha mong karamdaman

At kakalungin sa bisig ko ang mahinang katawan

Magdamag kitang babantayan

Sa luksa’t lumbay ng kadiliman

At ipapanalagin kong makita mo ang kariktan

Uunahin kita, Anak

Upang ika’y makapag-aral

At sa bawat layunin mo’y karamay sa pagpapagal

Sa kandungan ng kapayapaan

Sa landas ng pagkakapantay-pantay

Ihahanda ko ang daigdig

Sa masagana mong buhay.

Mas mahalaga sa akin ang iyong kinabukasan

Ang mga mas pangunahin na mga pangangailangan

Ang pangarap nang marami samundo

Ay hindi ko hahayaang mabigo.

Uunahin kita, Mahal

Sa munti nating tahanan

Dito sa lupang binubungkal

Lupang ating kinagisnan

At palagi kong pagsisikapan

Matagal na nating adhikain

Isang malayang sambayanan

Sa malayang lupain.

-- una ko siyang narinig na inawit ni bayang barrios sa Baguio Convention Center, simula noon, nahuli ko ang aking sarili na umibig sa kanya. Ito ang himig na lagi naming kinakanta ng aking mga kaibigan sa Science Annex sa UP Baguio hanggang sa mga kabundukan ng Kibungan. ang sarap alalahanin ang mga araw na mayroong nakaka-intindi ng mga awiting ganito.

ngayon sa ginagalawang mundo ko, muli k siyang narinig sa boses ni susan fernandez, laking gulat ko na mas maganda ang bersyon niya kaysa kay bayang (patawad). Natutuwa akong muli ko syang kapiling ngayon, kahit ako na lang ang umaawit......