ipinangako ni Philip ang kanilang muling pagtatagpo

ngunit ang pangako’y pinayuko ng pagkakataon 

ang pag-asa ang nagsisilbing tanglaw

sa nalalapit na kamatayan 

ang panghihina ng isa’y magbubukas ng bintana sa naiwan

sisilip ang ngiti at masisilayan ang tatlong bungi

simbolo ng kapayapaan 

ng panatag na kalooban

at pagtupad sa kasunduan

hindi sisibol ang pighati

sapagkat kapwa sila may binalikan

kapwa bumalik sa pinanggalingan 

 ang paghihintay ay mawawalan ng saysay

kung hindi masasabik.

kung hindi maiinip,

may mararating ba ang pinlanong paglalakbay

ng ibinugang usok? 

hihithitin lang din at ibubuga

…hithit…

…buga…

sabay pagpag

o kaya nama’y hihithitin at ibubuga

at pamamahingahin sa kanlungan ng iba

saka hihintayin ang unti-unting pangungupos

magkakaroon din ng silbi

ang tagasalo ng mga pinagsawaang sarap

ang tanging saksi sa mga tinangkang pagtakas 

lalamunin na naman ng usok na abo ang alaala ko

kelan nga ba magsasalubong ang kahapon at bukas?

kamatayan lang ang makapagbubuklod